రూపాయికి ఢోకా లేదు.. మధ్యప్రాచ్య ఉద్రిక్తతలపై నివేదిక

మధ్యప్రాచ్యంలో ఉద్రిక్తతలు పెరుగుతున్నప్పటికీ భారత ఆర్థిక వ్యవస్థపై దాని ప్రభావం చాలా పరిమితంగానే ఉంటుందని ఓ నివేదిక అంచనా వేసింది. రూపాయి విలువలో స్వల్ప క్షీణత, వృద్ధిరేటులో కొద్దిపాటి అంతరాయం మాత్రమే సంభవించవచ్చని, అయితే రక్షణ రంగ షేర్లు, బంగారం వంటి విలువైన లోహాల ధరలు పెరిగే అవకాశం ఉందని అసెట్ మేనేజ్‌మెంట్ సంస్థ 'శ్రీరామ్ వెల్త్' తాజాగా విడుదల చేసిన తన నివేదికలో పేర్కొంది.

రిజర్వ్ బ్యాంక్ ఆఫ్ ఇండియా (ఆర్బీఐ) అంచనాల కంటే ముడి చమురు ధరలు 10 శాతం పెరిగితే, దేశంలో ద్రవ్యోల్బణం 30 బేసిస్ పాయింట్ల వరకు పెరగొచ్చని ఈ నివేదిక తెలిపింది. అయితే, దీనివల్ల రూపాయి విలువ, ఆర్థిక వృద్ధిపై ప్రభావం నామమాత్రంగానే ఉంటుందని వివరించింది. ఆర్థిక వృద్ధి కేవలం 15 బేసిస్ పాయింట్లు తగ్గవచ్చని అంచనా వేసింది. అదే సమయంలో రూపాయి విలువ 5 శాతం క్షీణిస్తే, ద్రవ్యోల్బణం 35 బేసిస్ పాయింట్లు పెరిగినా, జీడీపీ వృద్ధికి 25 బేసిస్ పాయింట్లు కలిసొస్తుందని విశ్లేషించింది. ఆర్‌బీఐ జోక్యంతో రూపాయి పతనం పరిమితంగానే ఉంటుందని పేర్కొంది.

భారత ఆర్థిక వ్యవస్థ ప్రస్తుతం పటిష్ఠ‌మైన స్థితిలో ఉందని నివేదిక అభిప్రాయపడింది. 700 బిలియన్ డాలర్లకు పైగా ఉన్న విదేశీ మారక నిల్వలు, అదుపులో ఉన్న వాణిజ్య, కరెంట్ అకౌంట్ లోటు, తక్కువ ద్రవ్యోల్బణం, వడ్డీ రేట్లు వంటి అంశాలు ఆర్థిక వ్యవస్థకు రక్షణ కవచంగా నిలుస్తాయని తెలిపింది.

అయితే, ముడి చమురుపై ఆధారపడిన రసాయనాలు, పెయింట్స్, ఫార్మా, విమానయానం, టైర్ల వంటి రంగాలు మార్జిన్ల ఒత్తిడిని ఎదుర్కోవచ్చని హెచ్చరించింది. మరోవైపు ప్రపంచవ్యాప్తంగా రక్షణ వ్యయం పెరుగుతున్న నేపథ్యంలో దేశీయ రక్షణ రంగ కంపెనీలకు ప్రయోజనం చేకూరుతుందని అంచనా వేసింది. ఉద్రిక్తతలు మరింత పెరిగితే బంగారం, వెండి ధరలు స్వల్పకాలంలో పెరగవచ్చని, ఇది గోల్డ్, సిల్వర్ ఈటీఎఫ్ పెట్టుబడులకు సానుకూలమని సూచించింది. మధ్యప్రాచ్యంలో సుమారు 90 లక్షల మంది భారతీయులు నివసిస్తుండగా, దేశానికి వచ్చే విదేశీ చెల్లింపుల్లో వారి వాటా 38 శాతం కావడం గమనార్హం.